ភ្នំពេញ៖ ក្រសួងមហាផ្ទៃ ប្រកាសលុបឈ្មោះគណបក្សបេះដូងជាតិ ចេញពីបញ្ជីគណបក្សនយោបាយ បន្ទាប់ពីបានរកឃើញភាពមិនប្រក្រតីក្នុងការប្រមូលស្នាមេដៃ ដើម្បីស្នើសុំចុះបញ្ជីរបស់គណបក្ស។
តាមសេចក្ដីប្រកាសរបស់ក្រសួងមហាផ្ទៃ នៅថ្ងៃទី២ ខែមីនា ឆ្នាំ២០២២នេះ បានចេញប្រកាសមួយដោយសម្រេចលុបឈ្មោះ «គណបក្សបេះដូងជាតិ» ចេញពីបញ្ជីគណបក្សនយោបាយ។
ការចេញប្រកាសលុបឈ្មោះគណបក្សបេះដូងជាតិនេះ បានធ្វើឡើងបន្ទាប់ពី តុលាការកំពូល បានបើកសវនការ និងបានប្រកាសសាលដីកាសវនាការជាសាធារណៈ ដោយបិទផ្លូវតវ៉ា កាលពីថ្ងៃទី២៤ ខែធ្នូ ឆ្នាំ២០២១។
កាលពីថ្ងៃទី១២ ខែវិច្ឆិកា ឆ្នាំ២០២១ រដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង តាមលិខិតមួយច្បាប់ជម្រាបជូននាយករដ្ឋមន្ត្រីកម្ពុជា សម្ដេចតេជោ ហ៊ុន សែន ថាយោងតាមការស្រាវជ្រាវនិងកោសល្យវិច័យលើស្នាមមេដៃរបស់សមាជិកគណបក្សបេះដូងជាតិ ក្រសួងរកឃើញគណបក្សនេះបានប្រឌិតស្នាមមេដៃក្នុងបញ្ជីរាយនាមចូលជាសមាជិក ដែលមានចេតនាទុច្ចរិតក្នុងការបង្កើនបរិមាណសមាជិក។
ក្នុងលិខិតនោះបញ្ជាក់ថា ក្នុងស្នាមមេដៃ ៤ ៧៨១មេដៃ ដែលផ្ញើជូនក្រសួងមហាផ្ទៃដោយគណបក្សបេះដូងជាតិ ក្រសួងបានរកឃើញថាមានស្នាមមេដៃផ្ដិតខុសពីស្នាមមេដៃពីអត្ដសញ្ញាណបណ្ណ ២០នាក់ ស្នាមមេដៃ ២០នាក់ផ្ដិតលើឈ្មោះអ្នកដទៃ ៥៤នាក់ ស្នាមមេដៃក្លែងក្លាយ ៧៤ស្នាមមេដៃ ២៨ស្នាមមេដៃមិនអាចធ្វើកោសល្យវិច័យបាន និង៥នាក់បានផ្ដិតស្នាមមេដៃលើឈ្មោះមនុស្ស២១នាក់៕
